Hey Mutsch, ich wŁnsche mir es Pony!

Copyright Marianne Schauwecker

 
Chunsch grad us em Riitlager,
schmöcksch nach Sunneschii,
ehrlich gseit: es bitzli Schtallduft
mischt sich au no drii!
Häsch verfläckti Bluejeans aa,
verschtrublet isch diin Zopf,
gheisch diin Goffer in en Egge,
häsch nu eis im Chopf:

Hey Mutsch, ich wünsche miir es Pony!
'S Läbe isch nu halb so lässig ohni!
Weisch, sones schnügigs, härzigs, chliises,
aber doch nöd z'chlii!
Nöd so eis mit de z'churze Bei,
s'müest wienes Rössli sii!
Iir müend miir dänn s'ganz Läbe lang
gaar nie me öppis schänke!
Jetzt bitte, säg doch nöd grad nei,
und tues zeerscht überdänke!

Sitzisch a diim Schriibtisch,
mit Zädel überaall,
rächnisch uus, was `s Fueter choscht
und d'Mieti für en Schtall.
Plötzlich rüefsch: Als Schtall tuet's
uf de Nachberswise d'Schüür!
'S fähled jetzt no d`Tierarztchöschte, -
meinsch, die chömid tüür?

Hey Mutsch, ich wünsche miir es Pony!
'S Läbe isch nu halb so lässig ohni!
Weisch, Ponies händ so schööni Auge
und so weichi Fäll!
Und taufe würd ich's "Mulle", -
isch en schööne Name, gäll!
Wännt nei seisch chaufi sälber eis,
's isch abgmacht mit de Moni!
Au sii wett eis, - drum schpare miir jetzt
zäme uf es Pony!

Liisch im Bett und pfuusisch,
me gseht grad nu diin Schopf,
's einzig wo no füreluegt
isch diin verschtrublet Zopf.
Brummlisch i diis Chüssi,
und lachsch im Schlaf debii.
Sicher rüefsch au no im Traum
mit schtuurer Energie:

Hey Mutsch, ich wünsche miir es Pony!
'S Läbe isch nu halb so lässig ohni!
Ich schtand am halbi sächsi
jede Morge scho im Schtall!
Und wänni zschpaat id Schuel wür choo
wäär miir das piipegaal!
'S git Wichtigers im Läbe
als Multiplikation - ii
bi sicher, irgendwänn emaal
han ich beschtimmt miis Pony!

Zurück